Goffredo Boselli jipproponi tliet interventi li, filwaqt li jżomm fl-isfond l-ittra appostolika tal-Papa Franġisku Desiderio desideravi, jirriflettu fuq it-tema tal-formazzjoni liturġika tas-saċerdoti; iċ-ċelebrazzjoni tal-misteru tal-Għid permezz tal-ġest li għamel Ġesù, il-qsim tal-ħobż; l-aspett missjunarju tal-komunità li qed tiċċelebra u l-liturġija bħala realtà evanġelizzanti:

It-Tnejn 22 ta’ Mejju: Saċerdoti ffurmati mil-liturġija

It-tifsira tal-liturġija hija mitmugħa mill-prassi tal-liturġija u għalhekk l-ewwel skola tal-liturġija hija l-liturġija nfisha. Din ir-riflessjoni hija limitata għar-rwol tal-liturġija fil-formazzjoni liturġika tal-ministri ordnati, konxji li l-liturġija waħedha mhix biżżejjed għal formazzjoni tagħhom. Għas-saċerdot, il-liturġija hija l-ewwel skola ta’ talb. Barra minn hekk, hija l-liturġija nfisha li tifforma l-presbiteru biex jippresiedi l-liturġija. Fl-aħħarnett, il-presbiteru jitħarreġ mil-liturġija għall-mistagoġija, jiġifieri li jsir hu stess mistagogu tal-misteri li jiċċelebra.